मलाई श्राप देउ

ईश्वर मलाई , वैभव चहिन्न ,
विपन्नताकै , उपहार दिलाउ ।
त्यै मौका छोपी ,आफ्ना हरुको,
पहिचान गर्ने ,अवसर मिलाउ ।

आनन्द  मैले  ,खोजेको छैन  ,
कठिनाईहरुको , पहाड दिलाउ ।
कायर बनेको , मेरो यो मनलाई ,
हिम्मत  चुर्ण , घोटी  पिलाउ  ।

ईश्वर मलाई , बिचार होईन ,
जिउने कलाको , भ्रम दिलाउ ।
आफन्त जनको , रायले होईन ,
आफैं सुल्झाउने , आंट दिलाउ ।

अवसर र वरदान , मलाई चाहिन्न ,
आशिर्वाद पनि , तिनलाई दिलाउ ।
त्यसको दुरुपयोग , म चाहन्न कत्ति ,
मलाई  त  केवल ,श्राप  दिलाउ ।

ईश्वर!मलाई फूल ,नदेउ कहिल्यै ,
कांडाको झांगमा ,स्थान दिलाउ ।
क्षणिक  खुशी , चाहिन्न  मलाई ,
प्रभु ! सदाबहार , पिडा  दिलाउ ।

पराईको जाल तोडने,  चाहिन्न सिप,
त्यै जालमा हुर्कें म, बरु थप  दिलाउ ।
म  अर्को  अभिमन्यु , चाहन्न  बन्न,
स्वजनको  व्युह, तोड्न   सिकाउ  ।
                        -०-