गजल
**********
उमेर रहंदा मेहनत अत्यन्त गर्यौ , बुढेस कालमा खाउंला भनेर
नांगै  बसी  सन्तान  सिंगार्यौ , भविष्यमा  खुब  लाउंला  भनेर

आएछ वेला बुढेस कालको , न लाउन पायौ न त टन्न खायौ
तिनै लाई देखाई श्राद्ध गरेथ्थौ , आफूं नि पिण्ड पाउंला भनेर

जिउंदोमा जाउलोले भरेनौ पेट, पाल्न भनेर सन्तान हरु लाई
कमाउन  लाई  बेईमान  गरेनौ  , मरेसि  स्वर्ग  जाउंला  भनेर

झ्याउरेमा उठेन तिम्रा ति खुट्टा , मेलामा जान्थ्यौ नलगाई जुत्ता
संगीले वैंशमा दोहोरी गाउंदा , सांच्यौ स्वर किर्तन गाउंला भनेर

अब आउने छैनन तिम्रा ति लाला , पराईको पिज्जा बानी परेर
सोच्नै सकेनौ तिनका ति कर्तुत , बुढेस कालमा रुवाउला भनेर
                           -०-